საქართველოს საპატრიარქოსთან არსებულ „ჩოხოსანთა საზოგადოების“ ორგანიზებით საყოველთაო ჯვრისწერა 15 ოქტომბრიდან დაიწყო. ეს პროექტიც საყოველთაო ნათლობის მსგავსად სრულიად საქართველოს კათოლიკოს-პატრიარქის ლოცვა-კურთხევით ხორციელდება. 
ჯვრისწერის მიზანი ოჯახის სიწმინდისა და სიძლიერისათვის ხელის შეწყობაა. ჯვარდაწერილ წყვილებს ილია მეორე დალოცავს და მათ სამახსოვრო საჩუქარს – ოჯახის სიძლიერის ხატს გადასცემს. საყოველთაო ჯვრისწერა ყოველ შაბათს იმართება და დღევანდელი მონაცემებით უკვე 75 წყვილია ჯვარდაწერილი. მარხვის დაწყებამდე დაგეგმილია კიდევ ერთი საყოველთაო ჯვრისწერის ჩატარება – 19 ნოემბერს 38 წყვილი დაიწერს ჯვარს. წყვილთა რეგისტრაცია და ჯვრისწერის ცერემონიალი განახლდება ნათლისღების დღესასწაულის – 19 იანვრის შემდეგ კვირაში.
პროექტს სათავეში უდგას ჩოხოსანთა საზოგადოება – ზვიად სეხნიაშვილის ხელმძღვანელობით. ვის შეუძლია საყოველთაო ჯვრისწერაში მონაწილეობა და რა პროცედურების გავლაა საჭირო? „ამბიონს“ ამ თემაზე პროექტის კურატორი – პოეტი გიული ჩქარეული ესაუბრა:
„ჯვრისწერისათვის ასაკი შეზღუდული არ არის. თუმცა, საყოველთაო ჯვრისწერაში მონაწილეები რამდენიმე წლის დაოჯახებული წყვილები არიან, რომელთაც შეიძლება სხვადასხვა მიზეზის გამო არ ჰქონდეთ ჯვარი დაწერილი. პროექტის მიზანია მრევლი ეკლესიისკენ შემოვაბრუნოთ და რწმენაში გავაძლიეროთ.
საყოველთაო ჯვრისწერაში მონაწილეობის მსურველებმა რეგისტრაცია უნდა გაიარონ, უნდა იყვნენ მონათლულები. თუ მეორედ არიან ქორწინებაში და მეორედ იწერენ ჯვარს, უნდა ჰქონდეთ ჯვარი აყრილი. საჭიროა ქორწინების ბეჭდები, მეჯვარეების ყოლა და თან უნდა იქონიონ პირადობის დამადასტურებელი მოწმობა ჯვრისწერის მოწმობის შესავსებად“.
რაიონში მაცხოვრებელ წყვილებს შეუძლიათ მიაკითხონ თავიანთ ტაძარს, დაიწერონ ჯვარი, მონაცემები გადმოაგზავნონ და მათ შეიყვანენ საყოველთაო ჯვრისწერისას ჯვარდაწერილთა სიაში. თბილისში ჩამოსვლა აუცილებელი არ არის.
საყოველთაო ჯვრისწერაში მონაწილეობის მსურველებმა შეუძლიათ მიმართონ ორგანიზატორებს.
მის.: თბილისი, სამების საკათედრო ტაძრის ეზო, ჩოხოსანთა საზოგადოების ოფისი, ცენტრალური კარიბჭის გალავანი.
სამუშაო საათები: 15:00 სთ – 18:00 სთ.
სამუშაო დღეები: ორშაბათი-პარასკევი.
საკონტაქტო ინფორმაცია: რეგისტრაციის სამსახური, ხელმძღვანელი ქალბატონი გიული ჩქარეული(ჩოხოსანი) – 599 91 67 03
ნინო ქავთარაძე – 599 07 41 40
მოამზადა თეონა ნოზაძემ